சென்னை எஸ்.சி.இ.ஆர்.டி அலுவலகத்தில் லஞ்ச ஒழிப்பு அதிகாரிகள் திடீர் சோதனை

எஸ்.சி.இ.ஆர்.டி எனப்படும் மாநில கல்வியியல் ஆராய்ச்சி மற்றும் பயிற்சி நிறுவனத்தில் இயக்குநர் அறிவொளி பல்வேறு மோசடியில் ஈடுபடுவதாக தொடர்ந்து புகார்கள் எழுந்தது. குறிப்பாக அரசின் திட்டங்களில் இவர் பல பண மோசடி செய்ததாகவும் தகவல் வெளியானது. இந்நிலையில் மாநில கல்வியியல் ஆராய்ச்சி மற்றும் பயிற்சி நிறுவனத்தில் லஞ்ச ஒழிப்பு போலீசார் திடீரென சோதனை நடத்தி வருகின்றனர். கோபாலபுரத்தில் உள்ள அவரது இல்லத்திலும் சோதனை நடைபெற்றது. பல்வேறு மாவட்டங்களில் இருந்து ஆசிரியர்களை வரவழைத்து பாடதிட்டம் மற்றம் பாடப்புத்தகம் தயார் செய்வதற்கான ஆலோசனை கூட்டம் மாநில கல்வியியல் ஆராய்ச்சி மற்றும் பயிற்சி நிறுவனத்தில் நடைபெற்று வருகிறது. இந்த ஆசிரியர் குழுவினர் தகுதித்தேர்வு நடத்தி தேர்ந்தெடுக்கப்படுகின்றனர். அதன் பொறுப்பு இயக்குநர் அறிவொளியிடம் உள்ள நிலையில், கூட்டம் நடத்தியதாக போலி பில் தயாரித்து மோசடி செய்து வருவதாக புகார் அளிக்கப்பட்டது. மேலும் சிறார்களுக்கான தேன் சிட்டு என்ற மாத இதழும் இந்த குழுவினாரால் தயார் செய்யப்பட்டு வருகிறது. இதற்கென மாநில கல்வியியல் ஆராய்ச்சி மற்றும் பயிற்சி நிறுவனத்திற்கு தமிழக அரசு சுமார் 4 கோடி ஒதுக்கியுள்ளது. இதிலும் இயக்குநர் அறிவொளி முறைகேடு செய்துள்ளதாக குற்றம் சாட்டப்பட்டுள்ளது. அறிவொளி ஆசிரியர் தேர்வு வாரிய உறுப்பினராகவும் மற்றும் அனைவருக்கும் கல்வி திட்டத்தின் இயக்குநராகவும் செயல்பட்டுள்ளார். இந்நிலையில் அவர் மீது தொடர்ந்து புகார்கள் வந்ததை தொடர்ந்து லஞ்ச ஒழிப்பு அதிகாரிகள் சோதனை நடத்து வருகின்றனர். மேலும் அவரிடம் 5 மணி நேரத்திற்கும் மேலாக தீவிர விசாரணையும் நடத்தி வருகின்றனர்.

No comments:

Post a comment

||| www.new.kalvisolai.com ||| www.studymaterial.kalvisolai.com ||| www.tamilgk.kalvisolai.com ||| www.onlinetest.kalvisolai.com |||